ਹਰਿਆਣਾ ਦੇ ਪਲਵਲ ਜ਼ਿਲ੍ਹੇ ਵਿੱਚ ਵੀ ਯਮੁਨਾ ਦਾ ਪਾਣੀ ਓਵਰਫਲੋ ਹੋ ਗਿਆ ਹੈ। ਜਿਸ ਕਾਰਨ ਚਾਂਦਹਾਟ ਥਾਣਾ ਜਲ-ਥਲ ਹੋ ਗਿਆ। ਦੂਜੇ ਪਾਸੇ 14 ਪਿੰਡਾਂ ਵਿੱਚ ਪਾਣੀ ਦਾਖਲ ਹੋ ਗਿਆ ਹੈ ਅਤੇ ਇਕ ਘਰ ਵੀ ਪਾਣੀ ਵਿੱਚ ਡਿੱਗ ਗਿਆ। ਹੋਰ ਤਾਂ ਸਕੂਲ ਦੀ ਇਮਾਰਤ ਵੀ ਢਹਿ ਗਈ। ਪਲਵਲ ਵਿੱਚ 50 ਕਿਲੋਮੀਟਰ ਖੇਤਰ ਵਿੱਚ ਪਾਣੀ ਫੈਲ ਗਿਆ ਹੈ। ਜਿਸ ਦੇ ਮੱਦੇਨਜ਼ਰ 2 ਫੀਡਰਾਂ ਦਾ ਬਿਜਲੀ ਕੁਨੈਕਸ਼ਨ ਕੱਟ ਦਿੱਤਾ ਗਿਆ ਹੈ।
![](http://thepunjabtalks.com/wp-content/uploads/2023/07/IMG_9422-1024x705.jpeg)
ਦੂਜੇ ਪਾਸੇ ਘੱਗਰ ਵਿੱਚ ਬੰਨ੍ਹ ਟੁੱਟਣ ਕਾਰਨ ਸਿਰਸਾ ਅਤੇ ਫਤਿਹਾਬਾਦ ਵਿੱਚ ਸਥਿਤੀ ਲਗਾਤਾਰ ਵਿਗੜਦੀ ਜਾ ਰਹੀ ਹੈ। ਸਿਰਸਾ ਵਿੱਚ ਘੱਗਰ ਨਦੀ ਦਾ ਬੰਨ੍ਹ ਰਾਤ 10 ਵਜੇ ਮੁਸਾਹਿਬਵਾਲਾ ਅਤੇ ਨੇਜਾਡੇਲਾ ਖੁਰਦ ਨੇੜੇ ਟੁੱਟ ਗਿਆ। ਫਤਿਹਾਬਾਦ ਦੇ ਚਾਂਦਪੁਰਾ ਨੇੜੇ ਘੱਗਰ ਨਦੀ ਟੁੱਟ ਗਈ ਹੈ। ਰਤੀਆ ਇਲਾਕੇ ਵਿੱਚ ਕਈ ਥਾਵਾਂ ’ਤੇ ਪਾਣੀ ਓਵਰਫਲੋ ਹੋ ਗਿਆ ਹੈ, ਰੰਗੋਈ ਡਰੇਨ ਵੀ ਦੋ ਥਾਵਾਂ ’ਤੇ ਟੁੱਟੀ ਹੋਈ ਹੈ। ਪ੍ਰਸ਼ਾਸਨ ਨੇ ਹਾਲਾਤ ਖਰਾਬ ਹੁੰਦੇ ਵੇਖ ਫਤਿਹਾਬਾਦ ਦੇ 3 ਪਿੰਡਾਂ ‘ਚ ਧਾਰਾ 144 ਲਾਗੂ ਕਰ ਦਿੱਤੀ ਹੈ।
![](http://thepunjabtalks.com/wp-content/uploads/2023/07/IMG_9421-1024x696.jpeg)
ਡੀਸੀ ਪਾਰਥ ਗੁਪਤਾ ਅਤੇ ਐਸਪੀ ਉਦੈ ਸਿੰਘ ਮੀਨਾ ਸਿਰਸਾ ਵਿੱਚ ਬੰਨ੍ਹ ਟੁੱਟਣ ਤੋਂ ਬਾਅਦ ਹੜ੍ਹ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕਰਨ ਲਈ ਸਾਈਕਲ ’ਤੇ ਗਏ। ਦੋਵਾਂ ਦੇ ਨਾਲ ਸਰਕਾਰੀ ਕਰਮਚਾਰੀ ਵੀ ਬਾਈਕ ‘ਤੇ ਸਵਾਰ ਸਨ। ਦੂਜੇ ਪਾਸੇ ਸਿਰਸਾ-ਸਰਦੂਲਗੜ੍ਹ ਮੁੱਖ ਮਾਰਗ ’ਤੇ ਪੁਲੀਆਂ ਨੂੰ ਬੰਦ ਕਰਨ ਦੇ ਵਿਰੋਧ ’ਚ ਕਿਸਾਨਾਂ ਨੇ ਸੜਕ ’ਤੇ ਜਾਮ ਲਾ ਦਿੱਤਾ। ਰਾਜ ਵਿੱਚ ਅੰਬਾਲਾ, ਪੰਚਕੂਲਾ, ਕੁਰੂਕਸ਼ੇਤਰ, ਕਰਨਾਲ, ਯਮੁਨਾਨਗਰ, ਪਾਣੀਪਤ ਅਤੇ ਕੈਥਲ ਜ਼ਿਲ੍ਹੇ ਸਭ ਤੋਂ ਵੱਧ ਪ੍ਰਭਾਵਿਤ ਹੋਏ ਹਨ।
![](http://thepunjabtalks.com/wp-content/uploads/2023/07/IMG_9420-877x1024.jpeg)
ਇਸ ਦੌਰਾਨ ਪਾਣੀ ਦੀ ਤਬਾਹੀ ਦਾ ਸਾਹਮਣਾ ਕਰ ਰਹੇ ਯਮੁਨਾਨਗਰ ਵਿੱਚ ਅੱਜ ਸਵੇਰੇ ਇੱਕ ਵਾਰ ਫਿਰ 5 ਮਿਲੀਮੀਟਰ ਮੀਂਹ ਪਿਆ। ਯਮੁਨਾ ਦੇ ਕੈਚਮੈਂਟ ਖੇਤਰ ‘ਚ ਮੀਂਹ ਕਾਰਨ ਹਥਨੀ ਕੁੰਡ ਬੈਰਾਜ ‘ਚ ਪਾਣੀ ਵਧਦਾ ਜਾ ਰਿਹਾ ਹੈ। ਦੂਜੇ ਪਾਸੇ ਸੂਬੇ ਦੇ ਕਈ ਹੋਰ ਜ਼ਿਲ੍ਹਿਆਂ ਵਿੱਚ ਵੀ ਰੁਕ-ਰੁਕ ਕੇ ਮੀਂਹ ਪੈ ਰਿਹਾ ਹੈ। ਸਵੇਰੇ ਰੋਹਤਕ ਵਿੱਚ 1 ਮਿਲੀਮੀਟਰ, ਮਹਿੰਦਰਗੜ੍ਹ ਅਤੇ ਨਾਰਨੌਲ ਵਿੱਚ 1-1 ਮਿਲੀਮੀਟਰ ਅਤੇ ਨੂਹ ਦੇ ਮੰਡੋਕਲਾ ਵਿੱਚ 0.5 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ ਹੈ। ਹੋਰ ਕਈ ਜ਼ਿਲ੍ਹਿਆਂ ਵਿੱਚ ਮੌਸਮ ਖ਼ਰਾਬ ਹੈ।
ਦਸ ਦਈਏ ਕੁ ਯਮੁਨਾ ਨਦੀ ਨੇ ਇਸ ਵਾਰ ਕਈ ਜ਼ਿਲ੍ਹਿਆਂ ਵਿੱਚ ਤਬਾਹੀ ਮਚਾਈ ਹੋਈ ਹੈ। 4 ਜ਼ਿਲ੍ਹਿਆਂ ਯਮੁਨਾਨਗਰ, ਕਰਨਾਲ, ਪਾਣੀਪਤ ਅਤੇ ਸੋਨੀਪਤ ਵਿੱਚ ਹੁਣ ਪਾਣੀ ਘੱਟ ਰਿਹਾ ਹੈ, ਪਰ ਪਿੰਡ ਅਤੇ ਫਸਲਾਂ ਅਜੇ ਵੀ ਡੁੱਬੀਆਂ ਹੋਈਆਂ ਹਨ। ਫਰੀਦਾਬਾਦ ਅਤੇ ਪਲਵਲ ਵਿੱਚ ਵੀ ਯਮੁਨਾ ਦਾ ਪਾਣੀ ਆਪਣੀ ਮਾਰ ਵਿਖਾਉਣਾ ਸ਼ੁਰੂ ਹੋ ਗਿਆ ਹੈ।