ਪੋਹ ਦੇ ਮਹੀਨੇ ‘ਚ ਪੈ ਰਹੀ ਸੰਘਣੀ ਧੁੰਦ ਕਾਰਨ ਆਮ ਲੋਕਾਂ ਦਾ ਜੀਵਨ ਬਹੁਤ ਪ੍ਰਭਾਵਿਤ ਹੋਣ ਦੇ ਨਾਲ-ਨਾਲ ਹੀ ਰੇਲ ਗੱਡੀਆਂ ਵੀ ਪ੍ਰਭਾਵਿਤ ਹੋ ਰਹੀਆਂ ਹਨ। ਸੰਘਣੀ ਧੁੰਦ ਨੇ ਰੇਲ ਗੱਡੀਆਂ ਦੀ ਰਫ਼ਤਾਰ ਰੋਕ ਦਿੱਤੀ ਹੈ ਤੇ ਸਾਰੀਆਂ ਰੇਲ ਗੱਡੀਆਂ ਨਿਰਧਾਰਿਤ ਸਮੇਂ ’ਤੇ ਨਹੀਂ ਪਹੁੰਚ ਰਹੀਆਂ, ਜਿਸ ਕਾਰਨ ਫਿਰੋਜ਼ਪੁਰ ਰੇਲਵੇ ਡਵੀਜ਼ਨ ਵਲੋਂ 12 ਟਰੇਨਾਂ ਨੂੰ 24 ਦਸੰਬਰ 2022 ਤੋਂ 24 ਜਨਵਰੀ 2023 ਤੱਕ ਰੱਦ ਕਰ ਦਿੱਤਾ ਗਿਆ ਹੈ ਇਸ ਦੀ ਜਾਣਕਾਰੀ ਫਿਰੋਜ਼ਪੁਰ ਰੇਲਵੇ ਡਵੀਜ਼ਨ ਵਲੋਂ ਜਾਰੀ ਕਰ ਦਿੱਤੀ ਗਈ ਹੈ। ਧੁੰਦ ਨੂੰ ਦੇਖਦੇ ਹੋਏ ਜਿੱਥੇ ਟਰੇਨਾਂ ਆਪਣੇ ਨਿਰਧਾਰਿਤ ਸਮੇਂ ’ਤੇ ਨਹੀਂ ਪਹੁੰਚ ਪਾ ਰਹੀਆਂ ਅਤੇ ਕੁਝ ਟਰੇਨਾਂ ਦੇਰੀ ਨਾਲ ਚੱਲ ਰਹੀਆਂ ਸਨ, ਉੱਥੇ ਹੀ ਧੁੰਦ ’ਚ ਰੇਲ ਪਾਇਲਟ ਨੂੰ ਵੀ ਸਿਗਨਲ ਦੇਖਣ ’ਚ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ, ਜਿਸਨੂੰ ਦੇਖਦੇ ਹੋਏ ਨਾਰਦਰਨ ਰੇਲਵੇ ਦੀਆਂ 48 ਟਰੇਨਾਂ ਨੂੰ ਇਕ ਮਹੀਨੇ ਦੇ ਲਈ ਲਈ ਰੱਦ ਕੀਤਾ ਗਿਆ।
ਨਾਰਦਰਨ ਰੇਲਵੇ ਪੈਸੰਜ਼ਰ ਸੰਮਤੀ ਦੇ ਜ਼ੋਨਲ ਪ੍ਰਧਾਨ ਵਿਨੋਦ ਕੁਮਾਰ ਭਵਨੀਆ ਨੇ ਦੱਸਿਆ ਕਿ ਰੇਲਵੇ ਵਿਭਾਗ ਵੱਲੋਂ ਕੋਹਰੇ ਦੇ ਕਾਰਨ 25 ਦਸੰਬਰ 2022 ਤੋਂ 24 ਜਨਵਰੀ 2023 ਤੱਕ ਕੁਝ ਰੇਲ ਗੱਡੀਆਂ ਨੂੰ ਬੰਦ ਕੀਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਗੱਡੀਆਂ ’ਚ ਗੱਡੀ ਸੰਖਿਆ 06994 ਫਾਜ਼ਿਲਕਾ ਤੋਂ ਕੋਟਕਪੂਰਾ ਜੋ ਰਾਤ ਨੂੰ 8.10 ਵਜੇ ਫਾਜ਼ਿਲਕਾ ਤੋਂ ਚੱਲ ਕੇ 10.05 ਵਜੇ ਕੋਟਕਪੂਰਾ ਪਹੁੰਚਦੀ ਸੀ, ਗੱਡੀ ਸੰਖਿਆ 06991 ਕੋਟਕਪੂਰਾ ਤੋਂ ਸਵੇਰੇ 4.25 ਵਜੇ ਚੱਲ ਕੇ ਸਵੇਰੇ 6.10 ਵਜੇ ਫਾਜ਼ਿਲਕਾ ਪਹੁੰਚਦੀ ਸੀ, ਗੱਡੀ ਸੰਖਿਆ 06996 ਜੋ ਕਿ ਸਵੇਰੇ 2.35 ਵਜੇ ਫਾਜ਼ਿਲਕਾ ਤੋਂ ਚੱਲ ਕੇ 5.20 ਵਜੇ ਸਵੇਰੇ ਬਠਿੰਡਾ ਪਹੁੰਚਦੀ ਸੀ ਅਤੇ ਗੱਡੀ ਸੰਖਿਆ 06995 ਜੋ ਬਠਿੰਡਾ ਤੋਂ ਰਾਤ 8.15 ਵਜੇ ਚੱਲਕੇ ਰਾਤ 11.00 ਵਜੇ ਫਾਜ਼ਿਲਕਾ ਪਹੁੰਚਦੀ ਸੀ, ਸਾਰੀਆਂ ਨੂੰ ਕੋਹਰੇ ਕਾਰਨ ਇਕ ਮਹੀਨੇ ਲਈ ਬੰਦ ਕੀਤਾ ਗਿਆ ਹੈ।
