ਰੂਸੀ ਪੁਲਾੜ ਏਜੰਸੀ ਰੋਸਕੋਸਮੌਸ ਨੇ ਕਿਹਾ ਕਿ ਲੂਨਾ-25 ਪੁਲਾੜ ਯਾਨ ਕਰੈਸ਼ ਹੋ ਗਿਆ ਹੈ। ਲੂਨਾ-25 ਦੇ ਕਰੈਸ਼ ਨੂੰ ਰੂਸ ਲਈ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ। ਦਰਅਸਲ, 1976 ਤੋਂ ਬਾਅਦ ਇਹ ਪਹਿਲਾ ਮਿਸ਼ਨ ਸੀ, ਜੋ ਰੂਸ ਲਈ ਬਹੁਤ ਮਹੱਤਵਪੂਰਨ ਸੀ, ਪਰ ਇਹ ਸਫਲ ਨਹੀਂ ਹੋਇਆ ਹੈ। ਸੋਵੀਅਤ ਯੂਨੀਅਨ ਦੇ ਟੁੱਟਣ ਤੋਂ ਬਾਅਦ, ਰੂਸ ਨੇ ਕੋਈ ਚੰਦਰਮਾ ਮਿਸ਼ਨ ਲਾਂਚ ਨਹੀਂ ਕੀਤਾ ਸੀ। ਏਜੰਸੀ ਨੇ ਕਿਹਾ ਕਿ ਲੂਨਾ-25 ਪ੍ਰੋਪਲਸ਼ਨ ਅਭਿਆਸ ਦੌਰਾਨ ਚੰਦਰਮਾ ਦੀ ਸਤ੍ਹਾ ਨਾਲ ਟਕਰਾ ਗਿਆ।
ਏਜੰਸੀ ਵੱਲੋਂ ਜਾਰੀ ਬਿਆਨ ‘ਚ ਕਿਹਾ ਗਿਆ ਹੈ, ”19 ਅਗਸਤ ਨੂੰ ਲੂਨਾ-25 ਦੀ ਉਡਾਣ ਸ਼ਡਿਊਲ ਮੁਤਾਬਕ ਇਸ ਦੀ ਪ੍ਰੀ-ਲੈਂਡਿੰਗ ਅੰਡਾਕਾਰ ਔਰਬਿਟ ਬਣਾਉਣ ਲਈ ਤੇਜ਼ ਕੀਤਾ ਗਿਆ ਸੀ। ਸਥਾਨਕ ਸਮੇਂ ਮੁਤਾਬਕ ਦੁਪਹਿਰ ਕਰੀਬ 2:57 ਵਜੇ ਲੂਨਾ-25 ਦੀ ਸੰਚਾਰ ਪ੍ਰਣਾਲੀ ‘ਚ ਰੁਕਾਵਟ ਆ ਗਈ। ਇਸ ਕਾਰਨ ਕੋਈ ਸੰਪਰਕ ਨਹੀਂ ਹੋ ਸਕਿਆ।”
ਤੁਹਾਨੂੰ ਦੱਸ ਦੇਈਏ ਕਿ ਸ਼ਨੀਵਾਰ ਨੂੰ ਹੀ ਰੋਸਕੋਸਮੌਸ ਨੂੰ ਦੱਸਿਆ ਗਿਆ ਸੀ ਕਿ ਲੈਂਡਿੰਗ ਤੋਂ ਪਹਿਲਾਂ ਲੂਨਾ-25 ‘ਚ ਕੁਝ ਤਕਨੀਕੀ ਸਮੱਸਿਆਵਾਂ ਆਉਣੀਆਂ ਸ਼ੁਰੂ ਹੋ ਗਈਆਂ ਸਨ। ਇੱਕ ਬਿਆਨ ਵਿੱਚ, ਰੋਸਕੋਸਮੌਸ ਨੇ ਕਿਹਾ ਕਿ ਯੰਤਰ ਇੱਕ ਅਚਾਨਕ ਔਰਬਿਟ ਵਿੱਚ ਦਾਖਲ ਹੋਇਆ ਅਤੇ ਚੰਦਰਮਾ ਦੀ ਸਤ੍ਹਾ ਨਾਲ ਟਕਰਾਉਣ ਤੋਂ ਬਾਅਦ ਉਹ ਖਤਮ ਹੋ ਗਿਆ।
