ਪਿਛਲੇ ਮਹੀਨੇ ਨੂਹ, ਗੁਰੂਗ੍ਰਾਮ ਅਤੇ ਹਰਿਆਣਾ ਦੇ ਹੋਰ ਇਲਾਕਿਆਂ ਵਿੱਚ ਹੋਈ ਫਿਰਕੂ ਹਿੰਸਾ ਦੇ ਸਬੰਧ ਵਿੱਚ ਪੁਲਿਸ ਨੇ ਬਜਰੰਗ ਦਲ ਦੇ ਮੈਂਬਰ ਅਤੇ ਗਊ ਰੱਖਿਅਕ ਬਿੱਟੂ ਬਜਰੰਗੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਫਰੀਦਾਬਾਦ ਤੋਂ ਸਾਹਮਣੇ ਆਈ ਸੀਸੀਟੀਵੀ ਫੁਟੇਜ ‘ਚ ਸਾਦੇ ਕੱਪੜਿਆਂ ‘ਚ ਪੁਲਸ ਕਰਮਚਾਰੀ ਕਾਫੀ ਦੇਰ ਤੱਕ ਉਸ ਦਾ ਪਿੱਛਾ ਕਰਨ ਤੋਂ ਬਾਅਦ ਉਸ ਨੂੰ ਫੜਦੇ ਨਜ਼ਰ ਆਏ। ਉਸ ‘ਤੇ ਦੰਗਾ ਕਰਨ, ਹਿੰਸਾ ਕਰਨ, ਧਮਕੀਆਂ ਦੇਣ, ਦਫ਼ਤਰੀ ਕੰਮ ਵਿਚ ਵਿਘਨ ਪਾਉਣ, ਸਰਕਾਰੀ ਅਧਿਕਾਰੀ ਦੀ ਡਿਊਟੀ ਵਿਚ ਰੁਕਾਵਟ ਪਾਉਣ ਅਤੇ ਮਾਰੂ ਹਥਿਆਰ ਨਾਲ ਨੁਕਸਾਨ ਪਹੁੰਚਾਉਣ ਦਾ ਦੋਸ਼ ਹੈ। ਦੋਸ਼ ਹੈ ਕਿ ਉਸਦੇ ਅਤੇ ਬਜਰੰਗ ਦਲ ਦੇ ਵਰਕਰ ਮੋਨੂੰ ਮਾਨੇਸਰ ਵੱਲੋਂ ਦਿੱਤੇ ਗਏ ਭੜਕਾਊ ਬਿਆਨਾਂ ਕਾਰਨ ਹਿੰਸਾ ਭੜਕੀ ਸੀ। ਕਈ ਹੋਰ ਮਾਮਲਿਆਂ ਵਿੱਚ ਦੋਸ਼ੀ ਬਿੱਟੂ ਬਜਰੰਗੀ ਨੂੰ ਹਿੰਸਾ ਭੜਕਾਉਣ ਦੇ ਕਰੀਬ 20 ਦਿਨਾਂ ਬਾਅਦ ਉਸਦੇ ਘਰ ਨੇੜਿਓਂ ਫੜਿਆ ਗਿਆ ਹੈ।
ਦਸ ਦਈਏ ਕਿ 18 ਘੰਟਿਆਂ ਤੱਕ ਚੱਲੀ ਫਿਰਕੂ ਹਿੰਸਾ ‘ਚ 5 ਲੋਕ ਮਾਰੇ ਗਏ ਅਤੇ ਘੱਟੋ-ਘੱਟ 70 ਜ਼ਖਮੀ ਹੋ ਗਏ। ਇਹ ਹਿੰਸਾ ਨੂਹ ਤੋਂ ਗੁਰੂਗ੍ਰਾਮ ਅਤੇ 40 ਕਿਲੋਮੀਟਰ ਦੂਰ ਬਾਦਸ਼ਾਹਪੁਰ ਤੱਕ ਫੈਲੀ ਸੀ। ਬਿੱਟੂ ਬਜਰੰਗੀ ਉਰਫ ਰਾਜ ਕੁਮਾਰ ਫਰੀਦਾਬਾਦ ਦੇ ਗਾਜ਼ੀਪੁਰ ਬਾਜ਼ਾਰ ਅਤੇ ਡਬੂਆ ਮੰਡੀ ਵਿੱਚ ਫਲ ਅਤੇ ਸਬਜ਼ੀਆਂ ਦਾ ਵਪਾਰੀ ਹੈ। ਬਜਰੰਗ ਦਲ ਦਾ ਇਹ 45 ਸਾਲਾ ਮੈਂਬਰ ਪਿਛਲੇ ਤਿੰਨ ਸਾਲਾਂ ਤੋਂ ਗਊ ਰੱਖਿਆ ਗਰੁੱਪ ਚਲਾ ਰਿਹਾ ਹੈ। ਪਿਛਲੇ ਇੱਕ ਮਹੀਨੇ ਵਿੱਚ ਉਸ ਖ਼ਿਲਾਫ਼ ਧਾਰਮਿਕ ਭਾਵਨਾਵਾਂ ਭੜਕਾਉਣ ਦੇ ਤਿੰਨ ਕੇਸ ਦਰਜ ਕੀਤੇ ਗਏ ਹਨ। ਨੂਹ ਹਿੰਸਾ ਤੋਂ ਬਾਅਦ ਫਰੀਦਾਬਾਦ ‘ਚ ਗਊ ਰੱਖਿਆ ਬਜਰੰਗ ਫੋਰਸ ਦੇ ਮੁਖੀ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਸੀ।
ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਜਲੂਸ ਦੌਰਾਨ ਹਿੰਸਾ ਕਿਵੇਂ ਸ਼ੁਰੂ ਹੋਈ? ਇਸ ‘ਤੇ ਨੂਹ ਦੇ ਵਿਧਾਇਕ ਚੌਧਰੀ ਆਫਤਾਬ ਨੇ ਕਿਹਾ, ‘ਲੋਕ ਪਹਿਲਾਂ ਹੀ ਮੋਨੂੰ ਮਾਨੇਸਰ ਅਤੇ ਬਿੱਟੂ ਬਜਰੰਗੀ ਦੇ ਬਿਆਨਾਂ ਤੋਂ ਨਾਰਾਜ਼ ਸਨ ਅਤੇ ਅਫਵਾਹ ਫੈਲ ਗਈ ਸੀ ਕਿ ਮੋਨੂੰ ਮਾਨੇਸਰ ਆ ਗਿਆ ਹੈ। ਇਸ ਲਈ ਹਿੰਸਾ ਸ਼ੁਰੂ ਹੋ ਗਈ। ਪੁਲਸ ਨੇ ਦੱਸਿਆ ਕਿ ਬਿੱਟੂ ਬਜਰੰਗੀ ਨੂੰ ਫਰੀਦਾਬਾਦ ਤੋਂ ਨੂਹ ਪੁਲਸ ਨੇ ਹਿਰਾਸਤ ‘ਚ ਲਿਆ, ਜਿਸ ਨੂੰ ਪੁੱਛਗਿੱਛ ਤੋਂ ਬਾਅਦ ਗ੍ਰਿਫਤਾਰ ਕਰ ਲਿਆ ਗਿਆ। ਬਾਕੀ ਮੁਲਜ਼ਮਾਂ ਦੀ ਭਾਲ ਜਾਰੀ ਹੈ। ਪੁਲਿਸ ਕੋਲ ਮੌਜੂਦ ਵੀਡੀਓ ਤੋਂ ਬਿੱਟੂ ਬਜਰੰਗੀ ਦੇ ਸਾਥੀਆਂ ਦੀ ਪਛਾਣ ਕੀਤੀ ਜਾ ਰਹੀ ਹੈ। ਇਸ ਘਟਨਾ ਵਿੱਚ ਬਿੱਟੂ ਬਜਰੰਗੀ ਦੇ ਨਾਲ ਹੋਰ ਲੋਕਾਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਜਾਵੇਗਾ। ਪੁਲਿਸ ਦੇ ਕੰਮ ਵਿੱਚ ਰੁਕਾਵਟ ਪਾਉਣ ਵਾਲਿਆਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ। ਫਰੀਦਾਬਾਦ ਪੁਲਸ ਨੇ ਦੱਸਿਆ ਕਿ ਸਾਈਬਰ ਪੁਲਸ ਇਸ ਮਾਮਲੇ ‘ਚ ਸੋਸ਼ਲ ਮੀਡੀਆ ‘ਤੇ ਨਜ਼ਰ ਰੱਖ ਰਹੀ ਹੈ। ਪੁਲਿਸ ਕਿਸੇ ਵੀ ਤਰ੍ਹਾਂ ਦੇ ਭੜਕਾਊ ਭਾਸ਼ਣ ਜਾਂ ਗੁੰਮਰਾਹਕੁੰਨ ਖ਼ਬਰਾਂ ਫੈਲਾਉਣ ਵਾਲਿਆਂ ਖ਼ਿਲਾਫ਼ ਵੀ ਸਖ਼ਤ ਕਾਰਵਾਈ ਕਰੇਗੀ। ਜੇਕਰ ਕੋਈ ਵੀ ਜਾਤੀ/ਧਰਮ/ਜਮਾਤ ਦਾ ਵਿਅਕਤੀ ਸੋਸ਼ਲ ਮੀਡੀਆ ‘ਤੇ ਭੜਕਾਊ ਭਾਸ਼ਣ ਜਾਂ ਪੋਸਟ ਕਰਦਾ ਹੈ ਤਾਂ ਉਸ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
