28 ਮਈ ਨੂੰ ਹੋਣ ਜਾ ਰਹੇ ਨਵੇਂ ਸੰਸਦ ਭਵਨ ਦਾ ਉਦਘਾਟਨ ਸਮਾਰੋਹ ਪਿਛਲੇ ਲੰਮੇ ਸਮੇਂ ਤੋਂ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਦੌਰਾਨ ਜਿਥੇ ਰਾਸ਼ਰਪਤੀ ਤੋਂ ਇਹ ਉਦਘਾਟਨ ਨਾ ਕਰਵਾਉਣ ਅਤੇ ਸਮਾਰੋਹ ‘ਚ ਉਹਨਾਂ ਨੂੰ ਸ਼ਾਮਲ ਨਾ ਕਰਨ ‘ਤੇ 20 ਵਿਰੋਧੀ ਪਾਰਟੀਆਂ ਇਸ ਸਮਾਰੋਹ ਦਾ ਬਾਈਕਾਟ ਕਰ ਚੁੱਕੀਆਂ ਹਨ। ਉਥੇ ਹੀ ਹੁਣ ਇਹ ਖ਼ਬਰ ਸਾਹਮਣੇ ਆਈ ਹੈ 28 ਮਈ ਨੂੰ ਹੋਣ ਜਾ ਰਹੇ ਨਵੇਂ ਸੰਸਦ ਭਵਨ ਦੇ ਉਦਘਾਟਨ ਸਮਾਰੋਹ ‘ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 75 ਰੁਪਏ ਦਾ ਸਿੱਕਾ ਲਾਂਚ ਕਰਨ ਜਾ ਰਹੇ ਹਨ । ਵਿੱਤ ਮੰਤਰਾਲੇ ਨੇ ਵੀਰਵਾਰ ਨੂੰ ਕਿਹਾ ਕਿ ਨਵੇਂ ਸੰਸਦ ਭਵਨ ਦੇ ਉਦਘਾਟਨ ਦੀ ਯਾਦ ‘ਚ 75 ਰੁਪਏ ਦਾ ਵਿਸ਼ੇਸ਼ ਸਿੱਕਾ ਜਾਰੀ ਕੀਤਾ ਜਾਵੇਗਾ। ਸਿੱਕੇ ਦੇ ਇੱਕ ਪਾਸੇ ਅਸ਼ੋਕ ਥੰਬ ਬਣਿਆ ਹੋਵੇਗਾ, ਜਿਸ ਦੇ ਹੇਠਾਂ “ਸੱਤਿਆਮੇਵ ਜਯਤੇ” ਲਿਖਿਆ ਹੋਵੇਗਾ। ਖੱਬੇ ਪਾਸੇ ਦੇਵਨਾਗਰੀ ਲਿਪੀ ਵਿੱਚ “ਭਾਰਤ” ਅਤੇ ਸੱਜੇ ਪਾਸੇ ਅੰਗਰੇਜ਼ੀ ਵਿੱਚ “ਇੰਡੀਆ” ਲਿਖਿਆ ਜਾਵੇਗਾ। ਸਿੱਕੇ ‘ਤੇ ਸ਼ੇਰ ਤੋਂ ਹੇਠਾਂ ਰੁਪਏ ਦਾ ਚਿੰਨ੍ਹ ਅਤੇ ਅੰਤਰਰਾਸ਼ਟਰੀ ਅੰਕਾਂ ਵਿੱਚ 75 ਦਾ ਮੁੱਲ ਵੀ ਹੋਵੇਗਾ। ਸਿੱਕੇ ਦਾ ਦੂਜਾ ਪਾਸਾ ਸੰਸਦ ਕੰਪਲੈਕਸ ਦੀ ਤਸਵੀਰ ਦਿਖਾਏਗਾ। ਦੇਵਨਾਗਰੀ ਲਿਪੀ ‘ਚ ‘ਸੰਸਦ ਸੰਕੁਲ’ ਸ਼ਬਦ ਉਪਰਲੇ ਪੈਰੀਫੇਰੀ ‘ਤੇ ਅਤੇ ਹੇਠਲੇ ਪੈਰੀਫੇਰੀ ‘ਤੇ ਅੰਗਰੇਜ਼ੀ ‘ਚ ‘ਸੰਸਦ ਸੰਕੁਲ’ ਲਿਖਿਆ ਜਾਵੇਗਾ।
ਪ੍ਰਾਪਤ ਜਾਣਕਾਰੀ ਅਨੁਸਾਰ 75 ਰੁਪਏ ਦੇ ਇਸ ਸਿੱਕੇ ਦਾ ਵਜ਼ਨ 35 ਗ੍ਰਾਮ ਹੋਵੇਗਾ ਅਤੇ ਇਸ ਵਿੱਚ 50 ਫੀਸਦੀ ਚਾਂਦੀ, 40 ਫੀਸਦੀ ਤਾਂਬਾ ਅਤੇ 5-5 ਫੀਸਦੀ ਨਿਕਲ ਅਤੇ ਜ਼ਿੰਕ ਧਾਤੂ ਦਾ ਮਿਸ਼ਰਣ ਹੋਵੇਗਾ। ਇੰਨਾ ਹੀ ਨਹੀਂ ਸੰਸਦ ਦੀ ਤਸਵੀਰ ਦੇ ਬਿਲਕੁਲ ਹੇਠਾਂ ਸਾਲ 2023 ਵੀ ਲਿਖਿਆ ਜਾਵੇਗਾ। ਇਹ ਸਿੱਕਾ ਭਾਰਤ ਸਰਕਾਰ ਦੇ ਕੋਲਕਾਤਾ ਟਕਸਾਲ ਦੁਆਰਾ ਬਣਾਇਆ ਗਿਆ ਹੈ ਅਤੇ ਨਵੇਂ ਸੰਸਦ ਭਵਨ ਦੇ ਉਦਘਾਟਨ ਸਮਾਰੋਹ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੁਆਰਾ ਲਾਂਚ ਕੀਤਾ ਜਾਵੇਗਾ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਐਤਵਾਰ ਨੂੰ ਨਵੇਂ ਸੰਸਦ ਭਵਨ ਦੇ ਉਦਘਾਟਨ ਸਮਾਰੋਹ ਵਿੱਚ ਲਗਭਗ 25 ਸਿਆਸੀ ਪਾਰਟੀਆਂ ਦੇ ਸ਼ਾਮਲ ਹੋਣ ਦੀ ਸੰਭਾਵਨਾ ਹੈ, ਜਦੋਂ ਕਿ ਲਗਭਗ 21 ਪਾਰਟੀਆਂ ਨੇ ਸਮਾਰੋਹ ਦਾ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ। ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਸਮੇਤ ਸੱਤਾਧਾਰੀ ਰਾਸ਼ਟਰੀ ਜਮਹੂਰੀ ਗਠਜੋੜ (ਐਨ.ਡੀ.ਏ.) ਦੇ 18 ਹਿੱਸਿਆਂ ਦੇ ਨਾਲ-ਨਾਲ ਸੱਤ ਗੈਰ-ਐਨਡੀਏ ਪਾਰਟੀਆਂ ਇਸ ਸਮਾਗਮ ਵਿੱਚ ਸ਼ਾਮਲ ਹੋਣਗੀਆਂ। ਬਹੁਜਨ ਸਮਾਜ ਪਾਰਟੀ, ਸ਼੍ਰੋਮਣੀ ਅਕਾਲੀ ਦਲ, ਜਨਤਾ ਦਲ (ਸੈਕੂਲਰ), ਲੋਕ ਜਨਸ਼ਕਤੀ ਪਾਰਟੀ (ਰਾਮ ਵਿਲਾਸ), ਵਾਈਐਸਆਰ ਕਾਂਗਰਸ, ਬੀਜੂ ਜਨਤਾ ਦਲ ਅਤੇ ਤੇਲਗੂ ਦੇਸ਼ਮ ਪਾਰਟੀ ਸੱਤ ਗੈਰ-ਐਨਡੀਏ ਪਾਰਟੀਆਂ ਹਨ ਜੋ ਸਮਾਰੋਹ ਵਿੱਚ ਹਿੱਸਾ ਲੈ ਰਹੀਆਂ ਹਨ। ਇਨ੍ਹਾਂ ਸੱਤ ਪਾਰਟੀਆਂ ਦੇ ਲੋਕ ਸਭਾ ਵਿੱਚ 50 ਮੈਂਬਰ ਹਨ ਅਤੇ ਇਨ੍ਹਾਂ ਦਾ ਸਟੈਂਡ ਭਾਜਪਾ ਦੀ ਅਗਵਾਈ ਵਾਲੀ ਐਨਡੀਏ ਲਈ ਵੱਡੀ ਰਾਹਤ ਵਜੋਂ ਆਵੇਗਾ। ਇਨ੍ਹਾਂ ਪਾਰਟੀਆਂ ਦੀ ਸ਼ਮੂਲੀਅਤ ਐਨਡੀਏ ਨੂੰ ਵਿਰੋਧੀ ਧਿਰ ਦੇ ਇਨ੍ਹਾਂ ਇਲਜ਼ਾਮਾਂ ਦਾ ਖੰਡਨ ਕਰਨ ਵਿੱਚ ਮਦਦ ਕਰੇਗੀ ਕਿ ਇਹ ਸਰਕਾਰੀ ਸਮਾਗਮ ਹੈ।
ਭਾਜਪਾ ਤੋਂ ਇਲਾਵਾ ਸ਼ਿਵ ਸੈਨਾ, ਨੈਸ਼ਨਲ ਪੀਪਲਜ਼ ਪਾਰਟੀ, ਨੈਸ਼ਨਲ ਡੈਮੋਕ੍ਰੇਟਿਕ ਪ੍ਰੋਗਰੈਸਿਵ ਪਾਰਟੀ, ਸਿੱਕਮ ਕ੍ਰਾਂਤੀਕਾਰੀ ਮੋਰਚਾ, ਜਨਨਾਇਕ ਜਨਤਾ ਪਾਰਟੀ, ਏ.ਆਈ.ਏ.ਡੀ.ਐੱਮ.ਕੇ., ਆਈ.ਐੱਮ.ਕੇ.ਐੱਮ.ਕੇ., ਏ.ਜੇ.ਐੱਸ.ਯੂ., ਆਰ.ਪੀ.ਆਈ., ਮਿਜ਼ੋ ਨੈਸ਼ਨਲ ਫਰੰਟ, ਤਮਿਲ ਮਾਨੀਲਾ ਕਾਂਗਰਸ, ਆਈ.ਟੀ.ਐੱਫ.ਟੀ. (ਤ੍ਰਿਪੁਰਾ), ਬੋਡੋ ਪੀਪਲਜ਼ ਪਾਰਟੀ, ਪੀ.ਐੱਮ.ਕੇ. , ਐਮ.ਜੀ.ਪੀ., ਅਪਨਾ ਦਲ ਅਤੇ ਏ.ਜੀ.ਪੀ ਦੇ ਆਗੂ ਸਮਾਗਮ ਵਿੱਚ ਸ਼ਿਰਕਤ ਕਰਨਗੇ। ਕਾਂਗਰਸ, ਸੀਪੀਆਈ (ਐਮ), ਸੀਪੀਆਈ, ਤ੍ਰਿਣਮੂਲ ਕਾਂਗਰਸ, ਸਮਾਜਵਾਦੀ ਪਾਰਟੀ ਅਤੇ ਆਮ ਆਦਮੀ ਪਾਰਟੀ ਸਮੇਤ 21 ਪਾਰਟੀਆਂ ਨੇ ਨਵੀਂ ਸੰਸਦ ਭਵਨ ਦੇ ਉਦਘਾਟਨ ਦਾ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ।
